Белгілі болғандай, 39 жастағы азаматқа суық тиіп қалған. Кейін гаймориттің белгілері байқалды. Алайда ол дәрігерге қаралғанның орнына халық емі арқылы емделмек болады. Сөйтіп, мұрнын қайнатылған түймедақ суымен шайып, мия тамырының тұнбасын іше бастайды.
Әуелде жағдайы жақсарып келе жатқандай көрінгенімен бір аптадан соң көз тұсы қатты ауырсына бастады. Кейін көру қабілеті де нашарлай түскен. Тыныс алуы қиындап, дене қызуы көтеріліп, көзінде ісік пайда болған науқас шұғыл түрде Өскемен қаласындағы ауруханаға жеткізілді.
— Эндоскопиялық тексеру кезінде асқыну тудырған мұрын қуыстарының саңылауларын бітеп тастаған үлкен киста анықталды. Отадан кейін науқастың жағдайы тұрақтанды. Келесі күні көру қабілеті қалпына келе бастады, — деп хабарлады облыстық ауруханадан.
Осы ретте, дәрігерлер халық емімен өз-өзін емдеудің соңы аурудың одан сайын асқынуына әкеліп соғуы мүмкіндігін ескертеді.
