Бүгін Астана қаласында World Indoor Tour Gold бірінші кезеңінің салтанатты ашылуы өтті. «Qazaqstan» жеңіл атлетика кешенінде 40 мемлекеттен жиналған 110 спортшының басы қосылды. Олар заманауи нысанда 12 тәртіп (ерлерде де, әйелдерде — алтаудан) бойынша өз мүмкіндіктерін байқайды.
Парламент Сенатының төрағасы Мәулен Әшімбаев айтқандай, осындай жоғары деңгейдегі сайыстың Қазақстанда өтіп жатқаны қуанышты жағдай. Олимпиада ойындарының, Әлем чемпионаттары жүлдегерлерінің басым бөлігі осында.
— Astana Indoor Meet for Amin Tuyakov prizes бәсекесінде бақ сынайтын әр қатысушыға сәттілік және жарқын жеңістер тілейміз. Аталған жарысқа осы спортшы есімінің берілуі жайдан жай емес. Бұл желаяқ Қазақстан жеңіл атлетика тарихына өз атын алтын әріппен жазып қалдырған, — деді Мәулен Әшімбаев.
Ол сонымен қатар жеңіл атлетикада секундтар сыры ғана емес, адамның өзін-өзі жеңе білуі де аса маңызды екенін атап өтті. Бүгін қалың жанкүйерде сол тартысты тамашалауға жақсы мүмкіндік туып отыр.
