Шығыс Қазақстан облысының Ветеринария басқармасы қаңғырған жануарларды базаға тіркеу үшін бір миллион теңге бөлді.
Өңірдегі барлық аудандардағы және қала маңындағы шағын аудандардағы 2986 жануарға белгі орнатылуы тиіс. Чиптеу қаңғырған жануарларға, иесі жоқ ит-мысыққа жасалады.
— Бұл қызметтердің негізгі мақсаты – қаңғырған жануарлардың санын анықтау және оларды идентификациялау. Жануарды әкелген адам оның белгі нөмірін, ол туралы толық ақпарат беріп, жүргізілген ветеринариялық іс-шараларын да базаға енгізуі тиіс, — делінген мемлекеттік сатып алу порталының лот құжаттамасында.
Сондай-ақ тағы бір миллион теңге әлеуметтік осал топқа жататын адамдардың үй жануарларын идентификациялауға бөлінді. Мердігерлер микрочип түріндегі идентификациялауға арналған белгі сатып алып, үй жануарларын сәйкестендіру жұмыстарын жүргізуі тиіс. Кейін жануар туралы толық ақпарат және оған жасалған ветеринариялық іс-шаралар туралы деректері бар ID-микрочипті базаға енгізуі керек.
