Шығыс Қазақстан облысында қар көшкінінің алдын алу жұмыстары жалғасып жатыр.
ШҚО төтенше жағдайлар департаменті баспасөз қызметінің мәліметіне сүйенсек, «Өскемен-Таулы Үлбі-Солтүстік» тасжолының учаскесінде жасанды жолмен қар көшкіні жүргізілді.
— Тауда бірнеше жарылыс жасалып, 3150 текше метр қар түсірілді. Содан соң арнайы техникалармен жол қардан толықтай тазартылды, — делінген ақпаратта.
Айта кетейік, «Қазселденқорғау» мекемесінің мамандары тауларға мониторинг жүргізгеннен кейін профилактикалық мақсатта қар көшкінін түсіру қажеттілігі туралы шешім қабылдап отырады. Ал ТЖД қызметкерлері жұмыстардың қауіпсіздігін қамтамасыз етеді.