Бүгін ШҚО әкімдігінде өткен жиналыста экономикалық өсу мүмкіндіктері талқыға салынды. Өңірдің әр ауданында, әр саласында экономикалық дамуға үлкен мүмкіндіктер бар. Бұл – консерві өнімдерін өндіру, жергілікті өнімдерді көтерме және бөлшек саудаға шығару, ауыл шаруашылығында кооперацияны дамыту, ауыл шаруашылығы өнімдерін өңдеу арқылы шағын кәсіпкерлікті дамыту сынды бағыттар.
Аймақ басшысы Ермек Көшербаев жиынға қатысушыларға нақты жобаларды дамытуға қажетті жағдайлар жасауды тапсырды. Бұл жобалар бюджет кірісін арттырумен қатар, тұрақты жұмыс орындарын құруға ықпал етуге тиіс. Әкім барлық жаңа бастамалардың жобалық кеңсе қағидаты бойынша іске асырылуының маңыздылығын атап өтті. Бұл тәсілде салалық басқармалар мен жергілікті билік органдары, бизнес пен қоғам өкілдері тығыз ынтымақтастықта жұмыс істейді.
Айта кету керек, 2023 жылдың жазынан бастап облыстағы әр аудан мен саланың өндіріс пен тұтыну теңгерімі егжей-тегжейлі есептеліп келеді. Жобалық кеңсе қағидаты өңірлік және мемлекеттік деңгейдегі бағдарламаларды жүзеге асырудың негізгі құралына айналды. Әрбір қала, аудан және басқарма осы жүйе аясында тығыз ынтымақтастық орнатып, нақты нәтижелерге қол жеткізуді көздеп отыр.