Шығыс Қазақстан облысы Алтай ауданында құтқарушылар өртенген үйден бозбаланы аман алып шықты.
ШҚО Төтенше жағдайлар департаменті баспасөз қызметінің мәліметіне сүйенсек, оқиға Алтай ауданы Серебрянск қаласында болған.
— Жеке тұрғын үй аумағындағы шаруашылық қора-жайда өрт шықты. Түтін үйге де жайылып кетті. Құтқарушылар барлау жүргізу барысында түтінге оранған үйдің бөлмесінен 14 жастағы бозбаланы сыртқа алып шықты. Оның жағдайы қанағаттанарлық. Тексеруден кейін бала медициналық көмекке мұқтаж болған жоқ, — делінген ақпаратта.
Көп ұзамай жалпы ауданы 80 шаршы метрді құраған тілсіз жау толықтай сөндірілді. Өрттің шығу себебі анықталып жатыр.