Облыстық Ветеринария басқармасының мәліметіне сүйенсек, өңір бойынша соңғы төрт жылда мал арасында бруцеллез жұқтыру көрсеткіші 3 есе азайған. Нақты айтқанда, 2020 жылы 3478 болса, 2024 жылы — 1120.
Алайда бруцеллезге шалдыққан адам саны көбейді. Былтыр халық арасында 36 жағдай тіркелсе, оның алдыңғы жылдары ауру жұқтырғандар саны саусақпен санарлықтай еді. Науқастар арасында Марқакөл, Зайсан, Тарбағатай, Күршім, Үлкен Нарын, Глубокое, Ұлан аудандары мен Өскемен қаласының тұрғындары бар.
— Аурудың алдын алу үшін жаппай екпе салдыртып жатырмыз. Бұл мал басын 80 пайызға дейін қорғауға мүмкіндік береді. Десе де адамдардың бруцеллезге шалдығуы мәселесі әлі де өзекті, — дейді басқарма басшысы Рамиль Сағандықов.
Адамдар арасында ауырғандар санының артуына сапасыз өңделген ет пен сүтті тұтыну себеп болуы мүмкін. Сондықтан өңір жұртшылығына мал өнімдерінен тамақ дайындағанда мұқият болу қажеттігі ескертілді. Ұзақ термиялық өңдеңделген өнімдерде ғана бруцеллез бактериялары жойылады.
