3 желтоқсан — Халықаралық мүгедектер құқығын қорғау күні. Соңғы жылдары Қазақстанда мүмкіндігі шектеулі жандар үшін жасалатын жағдай күрт өзгерді. Бұл оңды үрдістен Шығыс Қазақстан облысы да қалыс қалмады. Мұнда ерекше қажеттіліктері бар балаларға жаңа әлеуметтік инклюзия және бейімделу бағдарламалары әзірленіп жатыр.
Облыста «Үлбі» және «DEMEY» орталықтары жемісті жұмыс істеп тұр. Онда балалармен логопедтер, дефектологтар, АВА-терапевттер, және басқа да мамандар жұмыс істейді. Винное ауылында ерекше қажеттіліктері бар балалар бейімделген ат спортымен айналысып, жоғары нәтижелерге қол жеткізген жабық ат спорты алаңы ашылды. Балалар мен олардың ата-аналары үшін Antares қоғамдық қоры Бұқтырма су қоймасының жағалауында тегін демалыс ұйымдастырды.
Жалпы өңірде ата-аналардың белсенділігі мен мемлекеттік қолдаудың арқасында балаларға барлық мүмкіндік жасалуда. Олар спортпен шұғылданып, шығармашылықпен айналысып, ән айтып, сурет салып, атқа мініп, теннис ойнай алады. Оларға өз қатарластарымен бірге уақыт өткізіп, аралас-құралас болып, мерекелік шараларға қатысып, концерт тамашалап, жағалауда демалу сынды басқаға қарапайым болған қуаныштар қолжетімді болды. Біз олардың жеңістері мен жетістіктеріне әркез қуанамыз, қолдан келгенше қолдауға әзірміз.
