Шығыс Қазақстан облысының делегациясының Қытай Халық Республикасы Шыңжаң-Ұйғыр автономиялық ауданына жұмыс сапары жалғасуда. Делегацияны аймақ басшысының орынбасары Бақытжан Байахметов бастап жүр.
Сапар барысында екі өңірдің инвестициялық әлеуетінің таныстырылымы өтті. Әуелі ШҚО әкімінің орынбасары мен ШҰАА Халық Үкіметі хатшылығы басшысының орынбасары Чжоу Чао өз сөздерімен шараның шымылдығын ашып, ізгі лебіздерімен бөлісті. Ары қарай екі тараптың өкілдері баяндамалар жасап, түрлі салалардағы көрсеткіштерді, алдағы жоспарларды сөз етті.
ШҚО Туризм басқармасының басшысы Ержан Сембинов өлкенің Қытай мен Ресей арасындағы көлік-логистикалық хабқа айналуға ниетті екенін жеткізді.
— 2024 жылы Мемлекет басшысының тапсырмасымен Бұқтырма су қоймасы арқылы өтетін Орталық Азиядағы ең ұзын көпір салынды. Екі жыл ішінде 1 жарым мың шақырым көлік жолы жөнделіп, қайта жаңғыртылды. Қытаймен шекаралас Катонқарағай және Зайсан аудандарында әуежайлар құрылысы басталды. Біз жылына 1 млн турист қабылдауға дайынбыз. Қытайлық компанияларды облыста туристік инфрақұрылымды дамытуда бірлесе жұмыс істеуге шақырамыз, — деді ол.
Сонымен қатар Шығыс Қазақстан агроөнеркәсіптік кешен мен өнімді қайта өңдеуде тұрақты өсім көрсетіп келеді. Энергетика саласында да мүмкіндіктер мол. Әсіресе 95 СЭС салынатын жерлер айқындалған гидроэнергетиканың әлеуеті зор.
Шара соңында тараптар B2B форматында келіссөздер жүргізіп, бірлескен жұмыстың жаңа бағыттарын талқылады.